Scho isch üse Jodlerobe vo däm Johr wieder Gschicht..

Am Fritiobe, 05. Apriu hei mir pünktlech um 20.00 Uhr mit üsem erschte Jodlerobe gstartet, üser Gescht a däm Obe sy d'Schwyzerörgeli-Familie Lehmann us Wynige u dr Jodlerklub Lotzwil gsi. Lehmann's oder wie mir säge, Lehme's hei de dä Obe mit lüpfiger Musig gstartet. Was wär doch üse Jodlerobe ohne sie? Sie ghöre doch eifach chli zu üs! Üser nächschte Gescht a däm Obe Si d'Jodlerinne u Jodler vom Jodlerklub Lotzwil gsi, ihri warme u schön klingende Tön hei eifach guet to. Abwächslend hei mir Choppiger mit üsne Gescht ä vieufäutige Obe mit schönem Jodelgsang u lüpfiger Musig chönne gstaute u mir gloube, äs hei ou üsi Zuhörerinne u Zuehörer ä schöne Obe mit üs chönne verbringe. De het es ou öppis Guets us dr Chuchi vom Garius Res gäh, feini Turte u zum Trinke hets ou gnue gha u ä riichhautigi Tombola isch für aui wo ihres Losglück hei probiert, parat gsi.

Am Samschtinomittag 06. Apriu isch de s'Chinderchörli vom Thalgrabe zu üs cho. Wunderschön, däm Jodlernachwuchs chönne zuelose u zuluege! Chlini Cowboys/Cowgirls si's einisch gsi, oder de Jäger uf dr Gemschjagd. U de hei üs Nachwuchsörgeler "eifach hüt" mit fägiger Örgelimusig ä schöne Nomittag zouberet. Leider isch de s'Wätter sehr schön u warm gsi, was villicht dr Grund isch gsi, dass mir am Samschtinomittag nid so viu Bsuecher hei gha. Aber die wo si cho, hei uf jede Fau Fröid gha u mir ou!

Am Samschtiobe isch es de witer gange; S'Trio Aaregruess het aus us ihrne Örgeli u Bassgiege kutzelet, lüpfig u fägig hei sie üse 2. Obe eröffnet. D'Jodlerinne u Jodler vom Jodlerklub Sumiswald sy a däm Obe zu üs uf Choppige cho. Mit ihne zäme hei mir ä abwächsligsriche Obe gstautet; "Bärgwanderig" vom Ueli Moor "s'Plange" vor Theres Aeberhard-Häusler, "Ätti, sing mit mir" vom Bruno Mathys, ä chline Usschnitt vo Lieder wo mir hei voreme voue Saal hei dörfe vorträge. D'Sumiswalder hei de sogar äs Nydelzältli mit im Gepäck gha.. nei nid eis zum schläcke, ä Naturjutz isch das gsi. Ou vorem- u nachem Konzärt sy üsi Bsuecher i Gnuss vo üsere Feschtwirtschaft mit guete SAche us dr Chuchi, feine Turte vo üsne liebe "Bäckerinne" u der schöne Tombola cho. Ou S'Tanzbei het a beidne Obe chönne gschwunge wärde u so wie mir hei gseh, het es s'einte oder angere Tänzli gäh.

Ganz charmant hei üs d'Seline Wittwer u ihre "Ätti" Kurt Bichsel dür die beide Jodlerobe gfüehrt. Danke viu Mou a Öich zwöi, dir heit das super gmacht!

Für d'Regula Blöchlinger u d'Yelena Buri, üses "Kücken" isch das dr erscht Uftritt a üsne beidne Jodlerobe gsi! Schön, stöht dir zwöi jtz ou i üsne Reihe! 

Ä härzleche Dank geit a aui üser Häufer wo üs a dene zwe Täg u Obe ungerstützt hei, a üser Gaschformatione wo zu dene glungnige Konzärt hei bytreit u eifach a aui, wo üs a däm Wucheänd si cho bsueche!

Mir Bärgbrünneler fröie scho uf üses nächste Konzärt! Danke viu Mou u bis gly ume..